Aksar mummiyo ki sikayat rehti hai ki unke bacche ghar par kuch bhi khana pasand nahi karte hai. Baccho ko keval bahar ka khana hi pasand aata hai. Yaha tak ki yadi wo unki pasand ki chize jaise sandwich, samose ghar par bhi banade tab bhi wo ise nahi khate hai.
Darahsal iske piche koi karan hai to wo hai chatpata swad jo unhe bahar ke khane mai milta hai. Bahar ki har chizo mai kafi swadhisht chutney aur sauces hote hai jo ki khane ka swad badha dete hai.
Bahar milne wale pizzas, dosa yeh sabhi tasty to hote hai lekin yeh sehat ka khayal rakhkar nahi banaye jate hai. Kaun janta hai ki inn chizo mai istemal kiya jane wala tel kaise hai. Ya fir inme jo sabjiya istemal ki gayi hai wo fresh hai ya nahi, thik se saaf ki gayi hai ya nahi?
Yadi aap iss hygiene ki tension se bachna chahte hai to apne ghar par hi chutney bana liya kare. Aur aesa jaruri nahi hai ki aapko inn chutney ke sath har bar kuch khas hi banana padhe, aap inhe paratho ke sath bhi apne baccho ko de sakti hai. To aaiye jante hai Chutney Recipes in Hindi.
Chutney Recipes in Hindi: Ghar Par Banaye aur Sab Khaye
Aam Ki Chutney
Baccho ko khatta mitha swad behad pasand aata hai. Isliye kyu na aap unko aam ki khatti mithi chutney banakar khilaye. Aur khas baat yeh ki aap inhe sade parathe ya puri ke sath bhi serve kar sakti hai.
| Samagri | Matra |
|---|---|
| Kacche Aam Ka Guda | 4 Aam |
| Gud | Sawa Cup |
| Tel | 2 Bade Chammach |
| Lal Mirch Powder | 1 Chota Chammach |
| Kalonji | 1 ½ Chote Chammach |
| Saunf | 2 Chote Chammach |
| Hing | ½ Chota Chammach |
| Namak | Swadanusar |
- Iss khatti mithi chutney ko banane ke liye aap aam ke gude aur gud ko chote chote tukdo mai kat le. Aap Gud Ke Fayde bhi iss link se dekh sakti hai.
- Kadhai mai tel garm kare aur tel ke garm hone par usme hing, kalonji aur sauf dalkar halka sa bhune.
- Jab masala bhun jaye to usme aam ke tukde dalkar hilaye. Fir namak, lal mirch powder dalkar acche se milaye.
- 1 minute hone de fir 1 cup pani dalkar kadhai par dhakkan rakh de aur 2-3 minute tak pakne ke liye rakh de.
- Ab kadhai mai tukde kiye huye gud ko dal de aur 2-3 minute ke liye pakne de.
- Khatti mithi aam ki chutney taiyar hai. Ise thanda hone de aur garmagaram puri ke sath iske maje le.
Imali Ki Chutney
Yadi aapke ghar par aalu ke parathe bane hai to fir sochna kaisa aap imali ki chutney taiyar kar le. Sath hi yadi aap kisi din dahi bada banati hai tab bhi yeh chutney dali jati hai.
| Samagri | Matra |
|---|---|
| Gud/ Shakkar | 3 Cup |
| Paki Hui Imali | 1 Cup |
| Garam Masala | 1 Chota Chammach |
| Lal Mirch Powder | 1 Chota Chammach |
| Elaichi Powder | 1 ½ Chota Chammach |
| Kala Namak | ¾ Chota Chammach |
| Namak | ½ Chota Chammach |
- Tamarind Chutney ko banane ke liye imali ko ek raat pehle pani mai bhigokar rakh de.
- Ab bhigi hui imali ko pani ke sath hi ubalne ke liye rakh de aur thanda hone ke liye rakh de.
- Imali ko acche se mash kar le aur chhan le. Gud ko bhi mahin karle aur imali ke paste mai mila de.
- Ab iss mishran mai 1 cup pani dalkar gas par rakh de. Ek ubal aane ke bad gas slow kar de.
- Ab ghol mai kishmish dal de. Yadi kishmish nahi bhi dalna ho to jaruri nahi hai.
- Ghol ko bich bich mai hilate rahe, isse wo tale mai chipkega nahi. Aapko ise gadha hone tak pakana hai.
- Jaise hi ghol gadha ho jaye usme garam masala, namak aur laal mirch dale aur 2 minute tak aur pakne de.
- Ab gas band karde aur elaichi powder dal de. Aapki chutney taiyar ho chuki hai.
- Aap ise thanda hone ke baad fridge mai rakhkar ek hafte tak istemal kar sakti hai.
Pudine Ki Chutney
Yadi aapne ghar mai aalubade ya bhajiye banaye hai to Pudine Ki Chutney ko banana na bhule. Aap ise roj khane ke sath bhi kha sakte hai. Pudina pet ki jalan aadi mai rahat dilata hai.
| Samagri | Matra |
|---|---|
| Pudine Ki Pattiya | 1 Cup |
| Kacche Aam | 2 |
| Hari Mirch | 4 |
| Bhuna Hua Jeera | 1 Chota Chammach |
| Kala Namak | ½ Chota Chammach |
| Namak | Swadanusar |
- Sabse pehle pudine ki patti ko acche se dho le. Iske bad aam ko bhi dhokar, uske gude ko katkar alag nikal le.
- Ab hari mirchi ko do tukdo mai kar le, lekin haa isse pehle iski dhanthal jarur nikal le.
- Ab pudine ki pattiya, hari mirch ke tukde, aam ke tukde, bhuna hua jeera aur namak sabhi ko acche se milakar mixer mai pees le.
- Aap ki swadhist chutney taiyar hai. Pure pariwar ke sath iska luft uthaye.
Lehusn aur laal Mirch Ki Chutney
Yadi aapke ghar mai sab tikha khane ke shoukin hai to aap lehsun aur laal mirch ki chutney banaye.
| Samagri | Matra |
|---|---|
| Lehusn | ½ Cup |
| Adrak | 2 inch ka Tukda |
| Jeera | 1 Chota Chammach |
| Tel | 1 Bada Chammach |
| Lal Mirch Powder | 3 Chote Chammach |
| Aamchur Powder | 1 Chota Chammach |
| Namak | Swadanusar |
- Lehusn ki chutney banane ke liye aap adrak ko acche se dho le fir use chote chote tukdo mai kat le.
- Ab mixer mai adrak ke tukde, lehsun, namak, aamchur powder sabhi chizo ko mix karke paste bana le.
- Ab pan mai tel dalkar garam kar le. Jab tel garam ho jaye to usme tadke liye jeera dale
- Ab peesa hua mishran kadhai mai dalkar use bhun le. Do minute tak chalate rahe taki yeh chipke nahi.
- Aapki tikhi chutney taiyar hai. Ise aap khichdi, sandwich, paratha aadi ke sath kha sakte hai.
Upar aapne jana Chutney Recipes in Hindi. Ab aap bhi apne har khane ka swad badha sakti hai aur apne ghar ke har member ko swadhist chize khila sakti hai. Yeh sabhi banane mai bhi aasan hai.