Subscribe Whatsapp

Rumali Roti Recipe in Hindi – Janiye Step by Step Vidhi

Jab bhi aap restaurant mai khana khane jate hai to aap rumali roti to jarur hi order karte honge. Yeh hamare Bharat desh mai bahut hi popular hai. Ham aapko yeh bhi batade ki yeh Punjabi vyanjan ka ek hissa bhi hai.

Rumali Roti bahut hi jyada mulayam aur patli hoti hai bilkul rumal ki tarah, isliye hi ise rumali roti naam diya gaya hai. Ise banane ke liye gehu ka aata aur maide ka istemal kiya jata hai, sath hi aate ko guthne ke liye pani ki jagah dudh ka istemal kiya jata hai.

Punjab, pakisthan mai ise lamboo roti bhi kaha jata hai. Yeh khane mai itni narm aur mulayam hoti hai ki muh mai jate hi pighal jati hai, aapko ise khane mai jyada mehnat nahi karni padhti hai. Yadi aap janna chahte hai ki yeh kaise banti hai to aaj ke lekh mai jaan le, kyoki aaj ke lekh mai ham aapko bata rahe hai Rumali Roti Recipe in Hindi.
 

Rumali Roti Recipe in Hindi: Ghar Par Kaise Banaye?

 
Rumali Roti Recipe in Hindi
 
Rumali roti ko log kadhai paneer ki sabji ke sath khana bahut pasand karte hai. Ab yadi aapki iss roti ko khane ki iccha ho bhi gayi, to jaruri to nahi hai ki aap har bar hotel ja paye. Ab aese mai to aapki iccha reh gayi na adhuri?

To kyo na aap iss roti ko khud hi banana sikh le. Taki aapka jab man chahe aap ise ghar par banakar iska luft uthaye. Aur aapko iss recipe ko samajhne mai dikkat na ho iske liye ham aapko iske lekh ke sath sath iski video bhi bata rahe hai taki aap ise aasani se samajh sake.
 


Samagri Matra
Gehu ka aata 1 ½ Cup
Maida ½ Cup
Dudh ½ Cup
Pani Jarurat ke anusar
Tel 2-3 chammach
Namak 2 pinch

 

How to Make Rumali Roti at Home: Ise Ghar Par Kaise Banaye

  • Sabse phele upar batai gayi quantity ke anusar gehu aur maida le, aur ise chhankar ek bartan mai nikal le.
  • Ab aate mai tel aur namak dalkar use masale, yane ki aapko aate ka moyan karna hai.
  • Ab dudh dalkar aate ko masle aur jarurat lage to pani dalkar naram mulayam aata guth le, iss aate ko kadak na guthe.
  • Guthe huye aate ko thoda set hone ki jarurat hoti hai isliye ise guthkar 25 minute ke liye dhakkar chod de. Isse aate mai lachilapan aata hai.
  • Ab aap iss aate ki choti choti loiya bana le. Iske bad ise banane ke do tarike hai.

 

Pehla Tarika

  1. Loi ko belkar choti si roti banale. Ab iss roti ko hatheli par rakhkar ghadi ke ulti disha mai ghumaye. Fir palatkar ghadi ke disha mai ghumaye.
  2. Aapko ise iss tarah ghumana hai ki iska diameter badh jaye, sath hi ise bahut hi aahista se kare.
  3. Ise kadhai mai kuch der ke liye pakaye. Ise jyada der na seke kyoki ise pakne mai jyada samay nahi lagta hai.

 

Dusra Tarika

  1. Do loi ki alag alag rotiya bel le. Ab ek roti ke upar ghee laga le, ya fir aap tel bhi laga sakte hai.
  2. Fir iske upar dusri bili hui roti rakhe aur corners ko daba de.
  3. Ab bani hui ek roti ko halke hatho se bel le aur tave par rakhkar dono taraf se sek le. Iss douran tave ko tej aanch par hi rakhe.
  4. Ab badi hi savdhani se dono roti ko alag alag kar le.
  5. Aapki naram naram rumali roti taiyar ho chuki hai.
  6. Bache huye aate se bhi isi tarah rotiya bana le.
  7. To yeh thi Rumali Roti Making ab jante hai ise parosne ka tarika.

 
Serving Ka Tarika: – Rumali roti ko 4 se 6 bar fold karke serve kiya jata hai. Ise aap veg aur non veg dono khan eke sath serve kar sakte hai.
 
Upar aapne jana Rumali Roti Recipe in Hindi. Iss roti ko aap apne manpasand khane jaise sabji, dal, achar kisi ke sath paros sakte hai. Sath hi yadi aapke ghar par mehman aane wale hai tab bhi aap yeh rotiya banakar tarifo ke pul pa sakte hai.
 

Related Post