Subscribe Whatsapp

Body Polishing in Hindi: Apnaye aur Ho Jaye Party Ready

December ka mahina shuru ho chuka hai. Aese mai har kisi ko ab intejar hai to naye saal ka. Naye saal ke swagat ke liye log 31st ko bahut dhum machate hai, partiya karte hai. Kuch to new year ki party ki taiyariya ek saal pehle se hi shuru kar dete hai.

Khaskar ladkiya ek mahine pehle se hi apne look par dhyan dena shuru kar deti hai, taki wo naye saal ki party mai acchi dikh sake.

Wo jamana gaya jab keval chehre ki khubsurti par dhyan diya jata tha. Ab mahilaye apne pure sharir ki khubsurti par dhyan deti hai. Isliye aajkal body polishing karne ka trend kafi badh gaya hai. Ise karwane se aapke pure sharir par chamak aa jati hai.

Yadi aap bhi body polishing karwana chahti hai lekin aapka budget nahi hai to koi baat nahi. Kyoki aaj ham aapko bata rahe hai ki kaise ghar par hi aap ise kar sakte hai. Chaliye aaj ke lekh mai ham jante Body Polishing in Hindi.
 

Body Polishing in Hindi: Jane Ise Ghar mai Karne Ka Tarika

 
Body Polishing in Hindi
 

  • Aapki khubsurti aapki twacha se hoti hai. Aap kitne hi gore kyo na ho yadi aapki twacha swasth nahi hai to aapka gora rang bhi bekar ho jata hai.
  • Isliye twacha ka swasth hona bhi jaruri hai. Lekin dhul, gandagi, aur rojmaara ke tanav ke chalte twacha ki khubsurti khatam ho jati hai.
  • Iske alawa suraj ki hanikarak kirno ke karan bhi twacha par kale dhabee padhne lagte hai. Tanning ke karan twacha ki ronak kam ho jati hai.

 

Kyo Kare Body Polishing?

  1. Body polishing se aapki twacha ki gehrai se saaf safai hoti hai aur mrit koshikaye hat jati hai.
  2. Twacha ke dead cells hatne ke karan twacha mai nikhar dikhai deta hai.
  3. Isse twacha mai rakt ka sanchar accha hota hai isliye isse twacha ki rangat bhi sudharti hai.
  4. Bhale hi yeh beauty badhane ki technique hai, lekin isse aap kaafi relax bhi mehsus karte hai.
  5. Body polishing ko aap ek tarah ka facial keh sakte hai. lekin yeh facial se thoda alag hai kyoki yeh body massage se thoda jyada hai.

 

Kaise Kare?

Body Polishing at Home ke liye aapko ek aesi jagah chahiye jaha aap aaram se baith sake aur jaha pani ki nikasi ho. Ya aap chahe to ise apni washroom mai bhi kar sakte hai basarte wo ek dam saaf suthri ho.
 

Step1: Body Cleansing

Body polishing ke liye aapko sabse pehle apne sharir ko saaf karna hai. Iske liye aap pehle gungune pani se naha le. Kisi tarah ke sabuna ka istemal na kare. Aur uske bad milk cleanser ki madad se pure shair par 2-3 minute tak halki massage kar le. Fir apne sharir par thoda pani dalkar ise hata de.
 

Step 2: Body Scrubbing

Yadi aap bahar se twacha ki polishing karwate hai to pehle aapke shair par scrubbing ki jati hai fir steam li jati hai. Yadi aapke pas ghar mai istemal kiye steam bath case hai to aap uske jariye steam le le aur yadi aapke paas yeh nahi bhi hai to koi baat nahi.

  • Yadi aapke pas steam bath hai to scrub se apne sharir ke malish kar le aur fir steam lele.
  • Yadi aapke pas yeh nahi hai to ek mugge mai garam pani le, aur usse bich bich mai apne sharir ko gila karte rahe.
  • Hatho mai scrub ko lekar apne pure shair jaise ki chehra, hath, pair, pet, peeth sab kar golai mai massage kare.
  • Yadi aapko kahi par bhi muhase hai to halke hatho se hi scrub kare nahi to twacha ko ulta nuksan hoga.

 
Aap chahe to market mai moujud scrub ka istemal kar sakte hai ya to fir ghar par bane scrub ka istemal kar sakte hai. Aaiye jante hai kuch ghar par banaye gaye scrub.

  1. Ek katori mai thodi chini, nimbu ka ras aur shahad milakar mix kar le.
  2. Dardare besan mai chutki bhar haldi aur dudh milakar scrub ki tarah prayog kare.
  3. Chawal ko halka burbura pees le, sath hi usme seb ka guda mix karke dale.

5-7 minute scrubbing hone ke bad apne sharir par gunguna pani dalkar ise dho le.
 

Step 3: Pure Body Ka Massage

Ab sharir par massage karne ke liye aap badam tel ya jojoba tel ka prayog kar sakte hai. Yeh twacha mai rakt sanchar badhakar, twacha mai glow lati hai. Isse twacha ko nami milti hai jisse kshatigrast koshikaye thik hoti hai. Badam ke tel mai twacha se tanning hatane ke gun bhi hote hai.

Tel twacha mai acche se absorb ho iske liye ekdum garm pani se bhari balti us room mai rakhe. Pani rakhte wakt savdhani barte. Garam pani ke bhaap se aapke sharir ke rom chiddra khulenge aur tel aasani se aapke sharir mai jayega.
 

Step 4: Body Pack

Ab bari aati hai lep lagane ki yadi aapki twacha teliya hai to chandan, gulab jal aur multani mitti se bana pack apne sharir par lagaye. Wahi yadi aapki twacha rukhi hai to taje aloevera se bane jel ko lagaye. 15- 20 minute lep lage rehne de fir dho le.
 

Step 5: Twacha Ko Nami De

Ab apne sharir ko cotton ke towel ki madad se halke hatho se ponch le aur fir kisi acchi quality ka mild lotion pure sharir par laga le. Iske bad agar possible ho to ek ghanta rest kare. Isse aapki twacha mai alag hi ronak aa jayegi.
 
Upar aapne jana Body Polishing in Hindi. Aap bhi upar batai gayi prakriya se apni twacha mai ronak lakar ise khubsurat bana sakte hai. Iss prakriya ko aap 15 din mai 2 bar kar sakte hai.
 

Related Post