Subscribe Whatsapp

Momos Recipe in Hindi – Ghar Par Garmagaram Banaye

Momos tibat ki prasiddha dish hai lekin ise hamare desh mai bhi kaafi pasand kiya ja raha hai. Kyonki yeh khane mai bahut hi swadisht hoti hai. Tatha jo log kam tel wali chize khana pasand karte hai unn logo ke liye momos bahut accha vikalp hai.
Inhe banane mai bahut kam tel ka istemal kiya jata hai tatha inhe bhaap ke dwara pakaya jata hai. Jiski wahaj se momos bahut jaldi pach jate hai. Isme sabjiya bhi hoti hai jisse sharir ko poshtik tatva mil jate hai.

Bacche momos khane ke bahut shokin hote hai, aur unhe bahar khilane se accha hai aap unhe ghar par hi ise bana kar khilaye. Agar bacche ghar par bane huye momos khayenge to aapko unke bimar hone ka dar bhi nahi laga rahega to jane Momos Recipe in Hindi.
 

Momos Recipe in Hindi – Jane Ise Banane Ki Vidhi

 
Momos Recipe in Hindi
 

Banane mai lagne wala samay 45 Minute
Kitne Logo ke Liye 4 Log
Swad Feeka

 

Momos Ki Stuffing Ke Liye Samagri

Shimla Mirch 1
Kaddukas Gobhi 1 Cup
Kaddukas Gajar ½ Cup
Kisa Hua Paneer ½ Cup
Tel 2 Chhoti Chammach
Kali mirch ¼ Chhoti Chammach
lal mirch powder ¼ Chhoti Chammach
Barik kati hari mirch 1
Adrak ka tukda kaddukas 1 inch
sirka 1 Chhoti Chammach
Soya sauce 1 Chhoti Chammach
Hara dhaniya(kata hua) 2 Chhoti Chammach
Namak Swadanusar

 

Momos Banane Ke Liye Aavshyak Samagri

1 Cup- Maida
 

Momos Recipe Banane Ki Vidhi

Aaj ham aapko Momos Making at Home bata rahe hai. Sabse pehle maide ko ek bartan mai chhan le. Ab iss aate ko ko pani se naram guth le tatha iss par saaf kapda dhak kar 1 ghante ke liye rakh de. Jab tak aapka aata ful kar set ho raha hai itni der mai stuffing taiyar kar le. Iske liye sabse pehle kadahi mai tel dale aur gas par garam karne ke liye rakhe.

Jab tel garam ho jaye to isme adrak aur hari mirch dale aur use bhun le, iske bad isme baki sari sabjiya aur paneer bhi dale. Ab isme sirka, lal mirch, kali mirch, soya sauce, namak aur hara dhaniya dalkar acche se 2 minute tak chalaye. Aapki stuffing bankar taiyar ho gai hai.

Aapka aata bhi set ho gaya hoga to guthe huye aate ki chhoti chhoti loi bana le aur 3 inch vyas ki gol gol bel le. Beli hui loi mai stuffing (Pitthi) bhar de aur charo tarah se moud kar band kar de. Isme gujiyo ko bharkar band karte hai aur wese hi band kare.

Isi tarah sare momos ko taiyar kar le. Iske bad momos ko bhap mai pakne ke liye momos pakane wala bartan le. Iss bartan mai niche ki taraf pani bhare aur upar ki taraf jali lagi hoti hai jinme momos ko rakha jata hai. Ek bartan mai karib 12 se 14 momos aa jate hai.

Inhe bhap se 10 minute tak pakaye sabse niche wale bartan ke momos pak gaye hai. Ab dusre bartan ko iske niche rakh de aur pake huye momos wale bartan ko upar kar de. 8 minute bad fir se upar rakhe bartan ko sabse upar kar de aur sabse upar wale bartan ko sabse niche rakh de.

Aur 5 se 6 minute tak isse bhap mai senk le. Ham bartan ko upar niche isliye karte hai kyonki upar bhap thodi kam jati hai jisse momos puri tarah pak nahi pate hai. To yeh thi aapki Veg Momo Recipe, ab aapke momos puri tarah taiyar hai.

Yadi aapke pas momos pakane ke liye bartan nahi hai to momos pakane wale bartan ki tarah ek bartan mai pani le aur uss par chawal channe wali channi ko uss par rakhe. Dhyan rakhe pani channi ke andar na jaye, ab isme momos rakhe aur use dhak de.
10 minute tak bhap se momos ko pakaye aur pake huye momos ko plate mai rakhe. Ab baaki bache huye momos ko bhi isi tarah bana le. Aapke momos taiyar hai inhe lal mirch ki chatni ya fir hari mirch ki chatni ke sath parose. Banaye huye swadisht momos pariwar mai sabko khilaye aur khud bhi khaye.
 
Upar apne jana Momos Recipe in Hindi. Iss recipe ki sahayata se aap ghar par hi lajij momos bana sakte hai jisme aapka dher sara pyar bhi hoga.