Subscribe Whatsapp

Sukhasana Yoga in Hindi – Chinta, Tanav aur Krodh Dur Kare

Yog ek tarah ka vyayam hai. Iske niyamit abhyas se aapka swasthya sudharta hai. Yahi wajah ki saalo se log ise apnakar apne swasthya mai izafa kar rahe hai. Yog ke antargat bahut sare aasan aate hai, jo aapko sharirik aur mansik fayde pahuchate hai.

Yog ko karke aap kai pareshaniya jaise koi bimari, motapa, sharir ka dard aadi se nijat paa sakte hai. Yadi aap yog ke liye naye hai to aapko yog ki shuruwat Sukhasana ke sath karna chahiye. Angreji mai ise Easy Pose ke naam se bhi jana jata hai.

‘Sukhasana’ shabd Sanskrit ke shabd ‘Sukham’ se aaya hai jiska arth hota hai sukh, shanti aur khusi. Har umra ke vyakti iss asana ko kar sakte hai. Jo log dhyan karna chahte hai unke liye bhi yeh asana bahut labhdayak hai. Iski vidhi aur labh janne ke liye padhiye Sukhasana Yoga in Hindi.
 

Sukhasana Yoga in Hindi: Jane Iski Vidhi aur Labh

 
Sukhasana Yoga in Hindi
 
Sukhasana ek tarah ka relaxation pose hai, ise khaskar dhyan ki sthithi mai baithne ke liye huii banaya gaya hai. Jaisa ki naam se hi pratit ho raha hai, yeh asana karne mai bahut hi aasan hai.
 

Iss Asana Ko Karne Se Pehle Ki Jankari

Yeh asana ek meditative pose hai isliye ise subah ke wakt karna accha hota hai. Vaise to iss asana ko khali pet karna jaruri to nahi hai lekin yadi aap iss asana ko karne ke baad aur bhi kai asana karte hai to behtar hoga aap ise khali pet hi kare. Yadi aapne kuch khaya hai to uske 5 ghante baad hi aap iska abhyas kare.
 

Sukhasana Yoga in Hindi: Jane Iski Vidhi aur Labh

  • Sukhasana Pose karne ke liye sabse pehle kisi samtal jagah ka chunav kar dari bicha le.
  • Ab palthi markar baith jaye.
  • Hatheli ko ek ke upar ek rakhkar, apne palthi par rakhe.
  • Sir ko bilkul sidha rakhe aur aankhe band karle.
  • Lambi lambi saanse le, aur apna dhyan shwasan kriya par lagaye.
  • Iss wakt aapko bilkul sidha baithna hai. Isliye apni pith aur merudand ko bilkul sidha rakhe.
  • Yadi aap jhukhkar baithenge to aapka aasan galat hoga.
  • Ab andar ki aur gehri saans le. Fir dhire dhire chhode. Iss wakt apne kandhe ko bilkul dhila chhod de.
  • Ho sakta hai shuruwat mai aapse baithte nahi ban raha ho to aap diwar ka sahara le sakte hai.

 

Sukhasana Benefits in Hindi – Janiye Iske Fayde

  1. Sukhasana karne se pairo ka rakt sanchar theek hota hai aur unme kriyasheelta badhti hai.
  2. Jo log tanav bhare mahol mai rehte hai, unhe iss asana ka abhyas jarur karna chahiye.
  3. Isse chinta, tanav, avsad aadi samasyao se nijat milta hai.
  4. Isse aapka vichlit man shant hota hai aur aap mansik sukh ki anubhuti kar paate hai.
  5. Jin logo ko pith mai dard ki samasya hai, unhe iss asana ko jarur karna chahiye.
  6. Isse ekagrata badhti hai, isliye students logo ko yeh asana jarur karna chahiye.
  7. Isse aapke sharir ka baithne ka posture sudharta hai. Jo log bina jukhe, sidhe nahi baith paate unhe iss asana ko jarur karna chahiye.
  8. Isse aapki ridh ki haddi lachili aur majboot banti hai.
  9. Isse chhati aur pair majboote hote hai.
  10. Yeh aapke takhno aur ghutno mai lachilapan lata hai.

 

Sukhasana Ke Pehle Ke Pose Dandasana
Sukhasana Ke Bad Ke Pose Anulom-Vilom, Kapalbhati
Karne Ka Samay Subah Ke Wakt
Kab Na Kare Ghutno mai Dard Hone Par
Iske Labh Ekagrata Badhaye, Tanav Dur Kare

 
Jab bhi aap sukhasana ka abhyas karte hai, tab aap iss baat ka acche se khayal rakhe ki aapke sharir ka vajan pure shair par aaye, na ki keval ek pair par. Iss baat ka bhi khayal rakhe ki aapke kandhe ek saman ho.

Aapki ridh ki haddi, aapka sar, aapke nitamb sabhi ek line mai hona chahiye. Jab aap iss mudra mai baithte hai to aapke pairo ko aaramdayak avastha mai rakhna mushkil hai. Lekin ek bar jab aapko iski aadat ho jayegi aap bahut hi aasani se ise kar payenge.
 
Upar aapne jana Sukhasana Yoga in Hindi. Yadi aapke pairo mai bahut dard ho to iss asana ko na kare. Sath hi yadi ridh ki haddi mai kisi parkar ki samasya ho tab bhi iss asana ko karne se bachna chahiye.